லாபத்தை நீ எடுத்துக்கோ.... நஷ்டத்தை நான் தர்றேன்....!

இந்தியா வளர்ந்து வரும் ஒரு நாடு. இந்த நாட்டிற்கு அணுசக்தி கட்டாய தேவையும் ஆகும்.

இந்த நிலையில் திங்களன்று நாடாளுமன்றத்தில் அணு இழப்பீடு மசோதா என்ற ஒன்றை காங்கிரஸ் தலைமையிலான கூட்டணி அரசு கொண்டு வர முடிவு செய்திருந்தது. எதிர்க்கட்சிகளின் கடும் எதிர்ப்பின் காரணமாக இந்த மசோதா தற்போது தள்ளி வைக்கப்பட்டுள்ளது.
இந்த மசோதா என்ன சொல்கிறது....
அமெரிக்கா, பிரான்ஸ், ரஷ்யா, கஜகஸ்தான் உள்ளிட்ட எட்டு நாடுகளுடன் அணுசக்தி உடன்பாடுகளை இந்தியா மேற்கொண்டுள்ளது. இப்படி வெளிநாடுகள் மூலம் அமைக்கப்படும் அணு உலைகளில் விபத்து ஏற்பட்டால் அதற்கு இழப்பீடு தொடர்பான “அணுசக்தி இழப்பீடு மசோதா” தான் அறிமுகப்படுத்த காங்கிரஸ் முனைந்தது.
என்ன இழப்பீடு...?
அணு உலை விபத்து ஏற்பட்டால், அந்த அணு உலையை இயக்கும் நிறுவனம், பாதிப்புக்கு ஈடாக ரூ.300 கோடி அளவிற்கு மட்டும் இழப்பீடு அளித்தால் போதும் என்று இந்த மசோதா வரையறை செய்கிறதாம்.
அதாவது, இந்த மசோதாவின்படி, அணுவிபத்து நேருமானால், அந்தவிபத்திற்கான இழப்பீடாக மொத்தம் ரூ.2 ஆயிரத்து 200 கோடி அளிக்கப்படுமாம். இதில், அணு உலையை செயல்படுத்தும் நிறுவனம் ரூ.300 கோடி முதல் ரூ.500 கோடி அளவிற்கு மட்டுமே பொறுப்பேற்றுக்கொண்டால் போதுமாம். அப்படியானால் மீதித் தொகையை யார் தருவது.. அரசுதான்... வேறு யாரு....

மேலும் லட்சக்கணக்கானோர் பாதிக்கப்பட்டாலும் யாரும் நீதிமன்றத்தில் இழப்பீடு கேட்டு செல்வதை இந்த மசோதா தடுத்துநிறுத்துகிறதாம்...
அணு உலை விபத்து ஏற்பட்டால், இந்தியாவில் அது அமைந்திருக்கும் பகுதியில் மிகப் பெரும் அழிவை ஏற்படுத்தும் என்பது எல்லோரும் நன்கு தெரிந்ததே. ஆனால் அந்தப் பேரழிவுக்கு ஈடாக, சம்பந்தப்பட்ட வெளி நாட்டு அணுசக்தி நிறுவனம் வெறும் ரூ.300 கோடி இழப்பீடு கொடுத்தால் போதுமானதென்று கூறி, வெளிநாட்டு அணுசக்தி நிறுவனங்களுக்கு ஆதரவான இந்த மசோதாவை தாக்கல் செய்ய முனைகிறார்கள். இந்த மசோதாவிற்கு கடந்த நவம்பர் 20ம்தேதியே மத்திய அமைச்சரவை ஒப்புதல் அளித்துவிட்டனராம்.
இன்னொரு விஷயம், தற்போது அமலில் உள்ள இந்த அணுசக்தி சட்டம் - 1962ன்படியானதாம். அதன்படி இந்திய அரசின் பொதுத்துறை நிறுவனமான இந்திய அணுசக்தி கழகம் மட்டுமே இந்தியாவில் அணுமின் உலைகளை அமைக்க முடியும் என்று உள்ளதாம். இதைத்தான் இப்ப மாற்ற துடிக்கிறார்கள்.
இதை சட்டவிரோதமானது என்று உச்சநீதிமன்றமே தீர்ப்பு வழங்கியுள்ளதாம்.
இதற்கு முன்பு போபால் விஷ வாயு தாக்குதலால் பலர் பாதிக்கப்பட்டதும், உயிரிழந்ததும் நினைவிருக்கலாம். இப்படியிருக்கையில் யாருடைய நலனுக்காக இந்த மசோதா கொண்டு வர இவர்கள் துடிக்கிறார்கள்...?
இது எப்படி இருக்குது என்றால்... லாபம் வந்தால் நீ எடுத்துக்கோ... நஷ்டம் என்று வந்தால் உனக்காக நான் இருக்கிறேன் என்று வெளி நாட்டு நிறுவனங்களுக்கு கோடி கோடியாய் தாரை வார்க்க இந்த அரசு தயாராக உள்ளது. மக்கள் நலன் என்றால் என்ன என்று விரைவில் கேட்பார்களோ!

சரித்திரத்தின் வாசல் திறந்தது

சுதந்திரம் பெற்று 63 ஆண்டுகள் கழித்து பல்வேறு போராட்டங்கள், வற்புறுத்தல்கள் என்று கடந்த பின் 2010 மார்ச் 9ம்தேதி மாலை நாடாளுமன்ற மாநிலங்களவையில் வாக்கெடுப்பின் மூலம் நிறைவேற்றப்பட்டது.
மக்கள் தொகையில் சரிபாதிக்கும் மேலாக உள்ள பெண்களின் ஜனநாயகம், சுதந்திரம் என்று பல்வேறு மேடைகளிலும், பத்திரிகைகளிலும் பேசப்பட்ட வந்த போதிலும் அவர்களுக்கான ஒதுக்கீடு என்பது நீண்ட போராட்டமாக இருந்து வந்தது.

இந்நிலையில் பட்ஜெட் கூட்டத் தொடரின்போது மகளிர் மசோதா இந்த கூட்டத் தொடரில் நிறைவேற்றப்படும் என்று அறிவிக்கப்பட்டது. அதனையொட்டி உலக மகளிர் தினமான மார்ச் 8அன்று விவாதத்திற்கு கொண்டு வரப்பட்டது. கடும் எதிர்ப்புகளும், அமளிகளும், ஒத்திவைப்புகளையும் சந்தித்து வந்தது. அதனைத் தொடர்ந்து மார்ச் 9ம்தேதி செவ்வாயன்று எதிர்க்கட்சித் தலைவர்களுடன் கூட்டம், சந்திப்புகள் என்று நடைபெற்ற பின் காலை நடைபெற்ற கூட்டத் தொடரிலும் கடும் அமளியே நிலவியது.
இந்த நிலையில் ஐமுகூட்டணியில் மம்தா பானர்ஜி திடீர் பல்டியாக எதிர்ப்பு தெரிவித்து வந்தார். பரபரப்புடன் கூடிய நாடாளுமன்றத்தில் மாலை ஓட்டெடுப்பு நடைபெற்றது. இதில் 186 உறுப்பினர்களின் ஆதரவோடும், மம்தாவின் எதிர்ப்பு காரணமாக 1 ஓட்டு எதிர்ப்போடும் இந்த மசோதா நிறைவேற்றப்பட்டது.
இந்த முதல் நிலையை தாண்டியுள்ளது அனைத்து தரப்பினருக்கும் மகிழ்ச்சியையும், உற்சாகத்தையும் ஏற்படுத்தியுள்ளது. இதன் மூலம் இந்தியா ஒரு புதிய சரித்திரத்திற்கு அடியெடுத்து வைத்துள்ளது.
இதே சூட்டோடு அனைத்துக் கட்சிகளின் ஒத்துழைப்போடு மக்களவையில் நாளை நிறைவேற வேண்டும் என்பதே ஜனநாயக எண்ணம் கொண்ட அனைவரும் ஆவலும், எண்ணமும்....

---

மாநிலங்களவையில் நிறைவேறிய மசோதா

இந்திய ஜனநாயக வரலாற்றில் முக்கியத்துவம் வாய்ந்த மகளிர் இடஒதுக்கீடு மசோதா மாநிலங்களவையில் நடைபெற்ற வாக்கெடுப்பில் வெற்றிகரமாக நிறைவேறியது.
நாடாளுமன்றம் மற்றும் மாநில சட்டமன்றங்களில் பெண்களுக்கு 33 சதவீத இட ஒதுக்கீடு வழங்க வகை செய்யும் மகளிர் இடஒதுக்கீடு மசோதாவை நிறைவேற்ற வேண்டுமென  பல்வேறு பெண்கள் அமைப்புகளும், கட்சிகளும் போராட்டம் நடத்தி வந்தன. வாய்ப்புகள் பல கிடைத்தும், சமாஜ்வாதி, ஆர்ஜேடி போன்ற கட்சிகளின் எதிர்ப்பினை காரணம் காட்டி இம்மசோதாவை காங்கிரஸ் மற்றும் பாஜக தலைமையிலான அரசுகள் இழுத்தடித்து வந்தன.
இந்தப் பின்னணியில், அரசியல் நிர்ப்பந்தம் காரணமாக காங்கிரஸ் தலைமையிலான ஐக்கிய முற்போக்கு கூட்டணி அரசு நடப்பு பட்ஜெட் கூட்டத்தொடரில், சர்வதேச மகளிர் தினத்தின் நூற்றாண்டு விழாவையொட்டி மார்ச் 8ம்தேதி திங்களன்று மகளிர் இடஒதுக்கீடு மசோதாவை  நிறைவேற்ற தீர்மானித்தது. இதற்கு ஐக்கிய முற்போக்கு கூட்டணி கட்சிகளும், பாஜக, இடதுசாரி கட்சிகள் உள்ளிட்ட அனைத்து எதிர்க்கட்சிகளும் ஆதரவு தெரிவித்தன.

ஆனால், மசோதாவில் பிற்படுத்தப்பட்டோருக்கு உள் ஒதுக்கீடு செய்ய வேண்டும் என்பதுள்ளிட்ட பிரச்சனைகளை முன்வைத்து, அதை இழுத்தடிக்கும் விதமாக முலாயம் சிங்கின் சமாஜ்வாதிகட்சி, லாலு பிரசாத்தின் ராஷ்ட்ரிய ஜனதா தளம் (ஆர்ஜேடி), ஐக்கிய ஜனதாதளத்தின் தலைவர்  சரத் யாதவ் மற்றும் மாயாவதியின் பகுஜன் சமாஜ் கட்சி ஆகியவை கடும் எதிர்ப்பு தெரிவித்தன.
இந்நிலையில், திங்களன்று மாநிலங்களவையில் மத்திய சட்ட அமைச்சர் வீரப்ப மொய்லி, மகளிருக்கு 33 சதவீத இடஒதுக்கீடு வழங்க வகை செய்யும் “அரசமைப்பு சட்ட (108வது திருத்த) மசோதா”வை தாக்கல் செய்தார். அப்போது சமாஜ்வாதி, ஆர்ஜேடி மற்றும் ஐக்கிய ஜனதாதள உறுப்பினர்கள் வரலாறு காணாத அராஜக அமளியில் ஈடுபட்டனர். அவைத்தலைவர் ஹமீது அன் சாரியின் கையிலிருந்த மசோதா ஆவணங்களை பறித்துக் கிழித்து எறிந்தனர். இத்தகைய அமளி மக்களவையிலும் ஏற்பட்டது. இதனால் இரு அவை களும் மீண்டும் மீண்டும் ஒத்திவைக்கப்பட்டன.
இந்தச்சூழலில் ஐக்கிய முற்போக்கு கூட்டணி அரசுக்கு அளித்துவரும் ஆதரவை சமாஜ்வாதிகட்சியும் ஆர்ஜேடியும் வாபஸ் பெறுவதாக திடீரென அறிவித்தன. இரு கட்சிகளும் வாபஸ் பெற்றாலும் கூட, அரசுக்கு ஆபத்து ஏதும் ஏற்படாது  என்று தெரிந்தும், நிலைமையை எதிர்கொள்ள திணறிய காங்கிரஸ் மேலிடம், திட்டமிட்டபடி திங்களன்று மாலை மாநிலங்களவையில் மசோதா மீது வாக்கெடுப்பு நடத்தாமல் ஒத்தி வைக்கும் யோசனையையே தேர்வு செய்தது.
இதனால் மகளிர் மசோதா நிறைவேறும் என்று எதிர் பார்த்திருந்த மகளிர் அமைப்பு கள் ஏமாற்றமடைந்தன.

அனைத்துக்கட்சி கூட்டம்

இந்தப்பின்னணியில், செவ்வாயன்று காலை அரசு, அனைத்துக்கட்சி கூட்டத்தை கூட்டியது. மக்களவையின் அவைத்தலைவர் பிரணாப் முகர்ஜி தலைமையில் நடை பெற்ற இக்கூட்டத்தில், மாநிலங்களவை எதிர்க்கட்சி தலைவர் அருண் ஜெட்லி, மார்க் சிஸ்ட் கம்யூனிஸ்ட்கட்சியின் நாடாளுமன்றக் குழு தலைவர் சீத்தாராம் யெச்சூரி, இந்திய கம்யூனிஸ்ட்கட்சியின் நாடாளுமன்ற தலைவர் டி.ராஜா, திமுக மாநிலங்களவை உறுப்பினர் திருச்சி என்.சிவா, அஇஅதிமுக மாநிலங்களவை தலைவர் டாக்டர் வி.மைத்ரேயன், பாஜக மாநிலங்களவை துணைத்தலைவர் எஸ்.எஸ்.அலுவாலியா உள்ளிட்டோர் பங்கேற்றனர். இக்கூட்டத்தில், மசோதா குறித்து விவாதம் நடத்தி, அதைத்தொடர்ந்து வாக்கெடுப்பு நடத்த வேண்டும் என்று இடதுசாரி கட்சிகளும், பாஜகவும் வலியுறுத்தின.

மீண்டும் ஒத்திவைப்பு

இதைத்தொடர்ந்து மாநிலங்களவை கூடியது. உடனே சமாஜ்வாதி மற்றும் ஆர்ஜேடி உறுப்பினர்கள் அமளியை துவக்கினர். மீண்டும் மீண்டும் மூன்று முறை அவையை ஒத்திவைக்க வேண்டிய நிலை, அவைத்தலைவர் ஹமீது அன்சாரிக்கு ஏற்பட்டது.
இந்நிலையில், திங்களன்று அவையில் அவைத்தலைவரை தாக்க முயற்சித்ததோடு ஆவணங்களை கிழித்தெறிந்து அநாகரிகமாக நடந்து கொண்ட ஏழு உறுப்பினர்களை சஸ்பெண்ட் செய்யும் தீர்மானத்தை அன்சாரி முன்மொழிந்தார். அப்போதும் மிகப்பெரும் அமளி ஏற்பட்டது.
சஸ்பெண்ட் செய்யப்பட்ட 7 உறுப்பினர்கள் மாலை 3 மணி வரையிலும் அவையிலிருந்து வெளியேறாமல் பிடிவாதமாக அமளியில் ஈடுபட்டவண்ணம் இருந்தனர். பின்னர் அவர்கள் அவைத்தலைவரின் உத்தரவின்பேரில் அவைக்காவலர் களால் பலவந்தமாக வெளியேற்றப்பட்டனர்.
இதன்பின்னர், மசோதா மீது விவாதம் நடைபெறும் என அறிவிக்கப்பட்டது.

விவாதம்-வாக்கெடுப்பு

மாலை மீண்டும் கூடிய அவையில் விவாதம் நடைபெற் றது. விவாதத்தில் மார்க்சிஸ்ட் கம்யூனிஸ்ட் கட்சியின் உறுப்பினர் பிருந்தா காரத் உள்ளிட் டோர், மகளிர் மசோதாவை நிறைவேற்ற வேண்டியதன் அவசியத்தை வலியுறுத்தியும், இந்த வரலாற்று வாய்ப்பை நழுவவிடக்கூடாது என்றும் வற்புறுத்தி பேசினர்.
இதைத்தொடர்ந்து மாலை சுமார் 6.30 மணியளவில் வாக்கெடுப்பு நடைபெற்றது.
வாக்கெடுப்பில் மசோதாவுக்கு ஆதரவாக 186 உறுப்பினர்களும் எதிராக 1 உறுப்பினரும் வாக்களித்தனர். இதைத் தொடர்ந்து மசோதா நிறைவேறியதாக அவைத்தலைவர் ஹமீது அன்சாரி அறிவித்தார்.

மம்தா திடீர் பல்டி

மகளிர் மசோதாவை நிறைவேற்றுவதில் காங்கிரஸ் தலைமையிலான ஐக்கிய முற்போக்கு கூட்டணியில் இடம்பெற்றுள்ள அனைத்து கட்சிகளும் ஆதரித்து வாக்களித்த நிலையில், மம்தா பானர்ஜியின் திரிணாமுல் காங்கிரஸ் திடீரென்று பல்டி அடித்தது. மாநிலங்களவையில் இந்த மசோதாவை நிர்மூலமாக்க அரசு சதி செய்வதாகக் குற்றம்சாட்டிய அவர், அதனால் வாக்கெடுப்பில் திரிணாமுல் கட்சி கலந்து கொள்ளாது என்று திடீரென்று அறிவித்தார். மாநிலங்களவையில் மம்தா கட்சிக்கு இரண்டு உறுப் பினர்கள் உள்ளனர்.  காங்கிரஸ் மேலிடம் சமாதானம் செய்தபோதிலும், மம்தா, மசோதாவுக்கு எதிராகவே செயல்பட்டார். மாநிலங்களவையில் நடைபெற்ற  வாக் கெடுப்பின்போது அக்கட்சியின் இரண்டு உறுப்பினர்களும்  அதில் கலந்து கொள்ளாமல் புறக்கணித்தனர். ஐக்கிய முற்போக்கு கூட்டணிக்கு எதிராக தங்களது எதிர்ப்பை பதிவு செய்தனர்.
முன்னதாக, தங்களது கட்சி தலைவியின் முடிவு குறித்து செய்தியாளர்களிடம் பேசிய திரிணாமுல் தலைமைக்கொறடாவும் மத்திய சுகாதாரத்துறை இணை அமைச் சருமான தினேஷ் திதிவேதி, மகளிர் மசோதாவை வலுக் கட்டாயமாக நிறைவேற்ற மேற்கொள்ளப்படும் முயற்சியை நாங்கள் ஆதரிக்க மாட்டோம் என்று கூறினார். மசோ தாவை நிறைவேற்றுவதில் இடதுசாரிகள் மற்றும் பாஜகவின் விருப்பங்களுக்கு ஏற்றவாறு அரசு செயல்படுவதால் ஆதரிக்க முடியாது என்று கூறினார்.

மாநில ஓட்டு நடந்த விபரம்:

• மாநிலங்களவையின் மொத்த உறுப்பினர்கள்: 245
• வாக்குரிமை பெற்ற உறுப்பினர்கள்: 233
• மசோதா நிறைவேற தேவை: 155
• மகளிர் மசோதாவுக்கு ஆதரவாக வாக்களித்த உறுப்பினர்கள்: 186
• எதிர்ப்பு வாக்கு: 1
• 2 உறுப்பினர் கொண்ட மம்தா கட்சி கடைசி நேரத்தில் திடீர் பல்டி.
• 15 உறுப்பினர் கொண்ட  பகுஜன் சமாஜ் கட்சி வெளிநடப்பு
• சரத்யாதவின் எதிர்ப்பையும் மீறி பீகார் முதல்வர் நிதிஷ்குமாரின் ஆதரவுடன் ஐக்கிய ஜனதா தள 7 உறுப்பினர்களும் ஆதரவு

விளம்பரத்தில் மோதல் போக்கை கடைபிடிக்கும் ரின்

தற்போது தொலைக்காட்சிகளில் ரின் சலவை தூளுக்கான விளம்பரம் அதிகமாக ஒளிபரப்பாகிக் கொண்டிருக்கிறது.
அதில், "2 பெண்மணிகள் பள்ளி பேருந்துக்காக காத்திருக்கும் போது ஒருவரின் கூடையில் டைடு சலவைத் தூளும், மற்றொருவரின் கூடையில் ரின் தூளும் இருக்கும். ஒருவரையொருவர் பார்த்துக் கொள்கின்றனர். டைடு சலவைத் தூள் வைத்துள்ள பெண், அருகில் நிற்கும் பெண்ணை பார்த்து இதில் வாசனையும் இருக்கு... வெண்மையும் இருக்கு... என்கிறார். ஒரு பார்வை பார்த்துவிட்டு திரும்பும் போது பள்ளி வேனிலிருந்து இவர்களது இரு பிள்ளைகளும் வருகின்றனர். இருவரும் வெள்ளை நிற ஆடைகளை அணிந்திருக்கின்றனர். டைடு பிராண்டை உயர்த்திப் பேசிய பெண், தனது மகனின் உடை மங்கலாக இருப்பதையும், இன்னொருவரின் சீருடை பளிச்சென இருப்பதையும் பார்த்து ஆச்சரியப்படுகிறார். மம்மி ஏன் ஆன்ட்டி ஆச்சரியத்துடன் பார்க்கிறாங்க... "என்று கேட்பது போல் சித்தரிக்கப்பட்டுள்ளது.
இப்போது 'டைடு'-ஐ விட வெண்மையை தரும் ரின். ஆச்சரியப்படும் விலையில் என்று விளம்பரம் வருகிறது.
சந்தையில் தனது பொருளின் விற்பனைக்காக ஒரு வித்தியாசமான கோணத்தில் விளம்பரம் செய்யப்படுவது உண்டு. யாரும் நேரடியாக ஒரு பிராண்டை விட தங்களது உயர்ந்தது என்று செய்யமாட்டார்கள். எந்த நிறுவனமும் இப்படி ஒப்பீடு செய்து விளம்பரம் செய்வதில்லை. ஆனால், சமீபத்தில் ரின் இப்படி ஒரு விளம்பரத்தை ஆரம்பித்து நேரடியாக மோதல் போக்கை கடைப்பிடிக்க தயாராகிவிட்டது.

தற்போது தொலைக்காட்சிகளில் வரும் விளம்பரங்களில் ஆபாசம் பெருகி வருகிறது. எப்படியாவது தனக்கென்று ஒரு சந்தையை பிடித்து விட போட்டி போட்டு விளம்பரம் செய்து வருகிறார். இதனால் எப்படி வேண்டுமானாலும் விளம்பரம் செய்யலாம் என்ற நோக்கில் பொய்யை புகுத்தி வர்த்தக விளம்பரங்களை எடுக்கிறார்கள்.
அதற்கு ஓர் உதாரணம் தான் ஹார்லிக்ஸ் விளம்பரம். "போருக்கு போகும் போது அலெக்சாண்டருக்கு மெமரி லாசாயிருந்தா?" என்றும், "ஐன்ஸ்டீன் அசந்து தூங்கிட்டாருன்னா?" என்றும் அவர்களை கேவலப்படுத்தி விளம்பரங்கள் செய்யப்படுகின்றன.
அந்த காலத்தில் எந்த ஹார்லிக்ஸ் இருந்தது. அவர்கள் எப்படி தங்களது திறமைகளை நிரூபித்தனர். யார் மனதையும் புண்படுத்தாமல் விளம்பரம் செய்ய இந்த விளம்பர நிறுவனங்கள் கற்றுக் கொள்ள வேண்டும்.
போட்டி என்பது தாங்கள் தயாரிக்கும் பொருளின் தரத்திலும், விலையிலும் காட்ட வேண்டும். அதுவே அவர்களுக்கு உயர்ந்த மார்க்கெட்டை பிடித்துக் கொடுக்கும். கவர்ச்சிகரமாக யோசிக்கிறேன் பேர்வழி என்று பொய்யையும், ஆபாசத்தையும், மோதலையும் புகுத்தாதீர்கள்....
அதை அரசும் கண்காணித்து தொலைக்காட்சிகளில் வரும் விளம்பரங்களுக்கு தணிக்கையை அமல்படுத்த வேண்டும்.

இளைஞர்கள் பற்றி சிந்திக்காத பட்ஜெட்

இந்திய நாடாளுமன்றத்தில் 2010-11ம் ஆண்டுக்கான பட்ஜெட்டை நிதியமைச்சர் பிரணாப் முகர்ஜி பிப்ரவரி 26ம்தேதியன்று காலை 11 மணிக்கு தாக்கல் செய்தார். 1 மணி நேரம் 50 நிமிடங்கள் வரை நீடித்த இந்த பட்ஜெட் உரை பிரணாப்பின் 5வது பட்ஜெட் உரையாகும்.

இந்த உரையின்போது, "பொருளாதார சரிவிலிருந்து இந்தியா மீண்டுள்ளதாகவும்; மொத்த உள்நாட்டு உற்பத்தியை அதிகரிப்பதே இலக்கு என்றும், விலை உயர்வு குறித்து கவலை குறித்து இந்த அரசு கவலைப்படுவதாகவும், விலை உயர்வை கட்டுப்படுத்த உறுதியான நடவடிக்கைகள் மேற்கொள்ளப்படும் என்றும், வரும் ஆண்டிற்குள் இந்த உயர்வு குறையும் என்று இந்த அரசு நம்புகிறது. பொது விநியோகத் திட்டத்தை நவீனமயமாக்கப்படுத்தவும், கிராமங்களில் அடிப்படை கட்டமைப்பை மேம்படுத்தவும், உணவு பாதுகாப்பை ஏற்படுத்துவதே இந்த அரசின் இலக்காகும். உள்நாட்டு உற்பத்தி விகிதம் 10 சதத்தை எட்டும் என்றும், நேரடி வரிச் சீர்திருத்த சட்டம் நிறைவடையும் தறுவாயில் உள்ளது என்றும்" மத்திய நிதியமைச்சர் கூறினார்.
மத்திய அமைச்சர் பிரணாப் முகர்ஜி தாக்கல் செய்துள்ள அம்சங்களில் முதலாவதாக பொதுத்துறை பங்குகளில் 25 ஆயிரம் கோடி அளவுக்கு விற்பதென்று அறிவித்துள்ளார். இந்த அறிவிப்பின் மூலம் இந்திய நாட்டின் சொத்துக்கள் சூறையாடப்படுகிறது என்பது மிகவும் தெளிவாகிறது. ஒருவன் வருவாய்க்கான தனது சொத்துக்களை விற்று செலவு செய்துவிட்டால், வருவாய் பெருகிவிடுமா? இதுபோன்ற செயலைத்தான் இந்திய அரசாங்கம் தற்போது செய்து வருகிறது.
நாட்டில் கணக்கில் வராத கறுப்பு பணம் பல்லாயிரக்கணக்கான கோடி ரூபாய் அளவுக்கு உள்ளது. இந்த பணம் குறித்து வாய் திறக்கமாட்டார்களா? சாதாரண விவசாயியிடம், சிறு - குறு வியாபாரிகளிடம் வரி செலுத்தாத, கடன் கட்டாதவர்கள் கடுமையான நடவடிக்கை எடுக்க முனைந்த இந்த அரசு, பல்லாயிரக்கணக்கான கோடி ரூபாய்களை வரி ஏய்ப்பு மூலம் ஏமாற்றி வருபவர்கள் மீது இந்த அரசு என்ன நடவடிக்கை மேற்கொண்டது.
நமது இந்திய நாட்டின் ஓரே நிதி வரவின் ஆதாரமாக விளங்குவது பொதுத்துறை தான். அதை விற்பது என்பது ஒரு மனிதன், தனது தேவைக்காக கண், கிட்னியை விற்றுச் சாப்பிடுவதற்கு சமம். இதைத்தான் இந்த அரசாங்கம் செய்கிறது.
இரண்டாவதாக, பெட்ரோலியப் பொருட்கள் மீதான வரி 10 சதமாகவும், கச்சா எண்ணெய்க்கு 5 சதமாகவும், உற்பத்தியின் மீது வரி உயர்வு என ஏழை, எளிய, நடுத்தர மக்களை கடுமையாக பாதிக்கும் வகையில் உயர்த்தியுள்ளது.
பெட்ரோலியப் பொருட்களின் மீதான வரி உயர்வின் காரணமாக அனைத்து கட்டணங்களும், விலைகளும் கடுமையாக உயரும். ஏனென்றால் இந்த ஒவ்வொரு பொருளுக்கு போக்குவரத்து மிக இன்றியமையா தேவையை என்பதை இந்த அரசு ஏன் உணர மறுக்கிறது. இதனால் அரிசி, பருப்பு போன்ற அத்தியாவசியப் பொருட்களின் விலை உயர்வால் ஏற்கெனவே அவதிப்பட்டு வரும் மக்கள் மேலும் அல்லலுற நேரும். அது சரி சாதாரண மக்களுக்கான பட்ஜெட்டாக இருந்தால்தானே இதைப் பற்றியெல்லாம் யோசிப்பார்கள்? இந்த விஷயத்தில் அனைத்து எதிர்க்கட்சிகள் ஒரே குரலில் எதிர்ப்புகளை வெளிப்படுத்தியுள்ளன. நாடாளுமன்றத்திலும் வெளிநடப்பு செய்துள்ளன.
அடுத்து, நாட்டின் மக்கள் தொகைக்கு உயர்ந்து கொண்டே வருகிறது. இப்படிப்பட்ட நேரத்தில் சிறு, சிறு ஒதுக்கீடுகள் உயர்வு என்று இந்த அரசு மாய்மாலம் காட்ட முற்படக்கூடாது. கல்வி, சுகாதாரம் இவையெல்லாவற்றுக்கும் இன்றைய தேவைக்கு இது பற்றாக்குறையாகவே இருக்கும்.

பல்வேறு நிதி நிறுவனங்கள் மோசடிகளிலும், ஏமாற்று வேலைகளிலும் இறங்கியுள்ள இக்காலங்களில், தனியார் வங்கிகளுக்கு அனுமதி தரப்படும் என்பது வெந்தப் புண்ணில் வேலை பாய்ச்சுவது போன்றதாகும்.
வேலையில்லா திண்டாட்டம் அதிகரித்துள்ளது. அவுட்சோர்ச்சிங் எனப்படும் வேலைகளை அளித்து வந்த அமெரிக்கா அந்த முறைகளை ஒழித்து வருகிறது. இப்படிப்பட்ட சூழ்நிலையில் இளைஞர்களுக்கான வேலைவாய்ப்பு குறித்தும், அவர்களின் மேம்பாடு குறித்தும் ஒரு துளிக் கூட வாய் திறக்கவில்லை இந்த பட்ஜெட். ஊரக வேலைவாய்ப்புகளும் அதிக்கப்படவில்லை என்பது குறிப்பிடத்தக்கது. இது ஏழை - சாதாரண மக்களுக்கு ஒவ்வாத பட்ஜெட்.
'என்ன வளம் இல்லை இந்த திருநாட்டில்; ஏன் கையை ஏந்த வேண்டும் வெளிநாட்டில்' என்று ஒரு எம்ஜிஆர் அவர்கள் நடித்த ஒரு பாடல் உள்ளது. சுயவேலை வாய்ப்பு திட்டத்திற்கு இந்த அரசு நமது நாட்டின் வளங்களை பயன்படுத்தி வேலைவாய்ப்பு அளிக்கவாவது இந்த அரசு முயற்சித்திருக்கலாம். எதுவும் இல்லாத இல்லை  என்பது மிகவும் வருத்ததிற்குரியது.

2010- 11ம் ஆண்டு பட்ஜெட்டின் சாராம்சங்கள் வருமாறு:

உரங்கள் மீது மானியம் குறைப்பு

• பொதுத்துறை நிறுவனங்களில் இருந்து ரூ. 25,000 கோடி பெறுமான பங்குகளை விற்க முடிவு
• உரங்கள் மீதான மானியம் குறைக்கப்படும்
• உணவுப் பற்றாக்குறையை தனியார் துறை உதவியோடு முடியடிப்படும்

வரி உயர்வுகள்

• பெட்ரோலிய கச்சா எண்ணெய் மீது மீண்டும் 5 சதவீத கலால் வரி
• பெட்ரோலிய பொருட்கள் மீதான சுங்க வரி லிட்டருக்கு 1 ரூபாய் அதிகரிப்பு
• பெட்ரோலிய விலைகள் குறித்த பாரிக் கமிட்டி பரிந்துரையை அமலாக்க யோசனை
• டிவி, பிரிட்ஜ், ஏசி உள்ளிட்டவற்றின் விலை உயரும்
• தங்கம் மற்றும் வெள்ளிக்கான இறக்குமதி வரி உயர்வு; தங்கத்திற்கு 10 கிராமுக்கு ரூ. 300 சுங்க வரி விதிக்கப்படும்.
• அதிகபட்ச சுங்க வரி 10 சதவீதமாக தொடரும்.
• பெரிய, ஏ.சி. கார்களுக்கு சுங்க வரி 22 சதவீதமாக உயர்வு
• ஏற்றுமதி வரி 8 சதவீதத்திலிருந்து 10 சதவீதமாக அதிகரிப்பு
• சிகரெட் மற்றும் புகையிலை மீதான சுங்க வரி அதிகரிப்பு

வரி சலுகைகள்

• விவசாய விதைகள் மீதான வரி முழுமையாக விலக்கு
• சிடி, செல்போன் உள்ளிட்டவற்றின் விலை குறையும்
• தனியார் நிறுவனங்கள் மீதான கூடுதல் வரி குறைப்பு
• நீண்டகால அடிப்படைக் கட்டமைப்புத் திட்ட பத்திரங்களில் முதலீடு செய்தால் ரூ. 20,000 முதலீடு செய்தால் வரி சலுகை கிடைக்கும்.
• ஆன்லைன் செய்தி நிறுவனங்களுக்கு சேவை வரி குறைப்பு
• ரூ. 20 லட்சம் வரையிலான வீட்டுக் கடன்களுக்கு 1 சதவீத வட்டிச் சலுகை

தனிநபர் வருமான வரி

• தனிநபர் ஆண்டு வருமானம் ரூ. 1.6 லட்சம் வரை உள்ளவர்களுக்கு முழு வரி விலக்கு
• தனிநபர்  ஆண்டு வருமானம் ரூ.1.6 லட்சம் முதல் ரூ. 5 லட்சம் வரை உள்ளவர்களுக்கு 10 சதவீதம் வரி
• தனிநபர்  ஆண்டு வருமானம் ரூ.5 லட்சம் முதல் ரூ. 8 லட்சம் வரை உள்ளவர்களுக்கு 20 சதவீதம் வரி
• தனிநபர்  ஆண்டு வருமானம் ரூ. 8 லட்சம் மேல் உள்ளவர்களுக்கு 30 சதவீதம் வரி
• வருமான வரி சலுகையால் ரூ. 26,000 கோடி இழப்பு ஏற்படும்

மகளிர் நலனுக்கு ரூ.22,300 கோடி

• பாதுகாப்புத் துறைக்கு ரூ. 1.47 லட்சம் கோடி நிதி ஒதுக்கீடு
• ஒருங்கிணைந்த தேசிய அடையாள அட்டை திட்டத்துக்கு ரூ. 1,900 கோடி
• பெண் விவசாயிகள் நலத் திட்டத்துக்கு ரூ. 100 கோடி
• சிறுபான்மையினர் நலத்துறைக்கு ரூ. 2,600 கோடி
• ரூ. 1000 கோடியில் அமைச்சாரா தொழில் பிரிவினருக்கான சமூக பாதுகாப்பு நிதியம்.
• ஊரக வளர்ச்சிக்கு ரூ. 66,000 கோடி ஒதுக்கீடு
• மகளிர், குழந்தைகள் நலனுக்கு ரூ.22,300 கோடி

காப்பீட்டு திட்டம் அறிமுகம்

• தேசிய ஊரக வேலைவாய்ப்புத் திட்டத்துக்கு ரூ. 40,100 கோடி ஒதுக்கீடு
• தேசிய ஊரக வேலைவாய்ப்புத் திட்ட பணியாளர்களுக்கு 'ஸ்மார்ட் கார்ட்' அறிமுகம்
• தேசிய ஊரக வேலைவாய்ப்புத் திட்ட பணியாளர்களுக்கு காப்பீட்டு திட்டம் அறிமுகம்
• நகர்ப்புற வளர்ச்சி, நகர்ப்புற ஏழைகள் நலனுக்கு ரூ. 5,400 கோடி
• இந்திரா ஆவாஸ் யோஜனா திட்டத்திற்கு ரூ. 10,000 கோடி
• புந்தல்கந்த் வறட்சி நிவாரணத்திற்கு ரூ. 1200 கோடி நிதியுதவி

கல்விக்கு ரூ.22,300 கோடி

• பாரத் நிர்மாண் திட்டத்திற்கு ரூ. 48,000 கோடி
• பள்ளிக் கல்வித் திட்டங்களுக்கு ரூ. 31,600 கோடி
• சுகாதாரத் துறை திட்டங்களுக்கு ரூ. 22,300 கோடி
• மின் சக்தித் துறைக்கு ரூ. 5,130 கோடி
• சாலை கட்டமைப்பு வசதியைப் பெருக்க ரூ. 19894 கோடி
• அடிப்படைக் கட்டமைப்பு வசதி மேம்பாட்டுக்கு ரூ. 1.73 லட்சம் கோடி
• மரபு சாரா எரிசக்தித் திட்டங்களுக்கு ரூ. 1000 கோடி நிதி ஒதுக்கீடு.
• திருப்பூர் சாயப்பட்டறை கழிவுநீர் சுத்திகரிப்புக்கு ரூ.200 கோடி
• வட கிழக்கில் விவசாயத்துறையை ஊக்குவிக்க ரூ. 400 கோடி நிதியுதவி

பற்றாக்குறை 5.5 சதவீதம்

• விவசாயக் கடன்களுக்கு 2 சதவீத மானியம்
• 2022ம் ஆண்டில் 20,000 மெகாவாட் சூரிய மின்சக்தி உற்பத்தி செய்ய இலக்கு
• ரூ. 15 லட்சத்துக்கு மேல் வருமானம் ஈட்டும் நிறுவனங்களுக்கு கட்டாய தணிக்கை
• 2000 மக்கள் தொகை கொண்ட எல்லா கிராமங்களிலும் வங்கிகள் திறக்கப்படும்
• மோனோ ரயில்களுக்கு இறக்குமதி திட்ட அந்தஸ்து
• இந்த ஆண்டு நிதிப் பற்றாக்குறை 5.5 சதவீதமாக உள்ளது
• உணவுப் பாதுகாப்பு சட்ட மசோதா தயார்
• திட்ட செலவுகள் 15 சதவீதம் அதிகரித்துள்ளது
• மொத்த வரி வருமானம் ரூ. 7.46 லட்சம் கோடியாக இருக்கும்

வங்கியில் தனியார்

• குறைந்த விலை வீடுகளுக்கான மானியம் நீட்டிப்பு. குடிசையில்லா நகர்களை உருவாக்க திட்டம்
• நடப்பு பொருளாதார வளர்ச்சி 7.2 சதவீதமாக உள்ளது
• அதிக தனியார் வங்கிகளுக்கு அனுமதி வழங்கப்படும்.
• வங்கித் துறையில் தனியாரை ஊக்குவிக்க நடவடிக்கை
• சில்லறை வர்த்தகம் தொடர்பான உறுதியான நடவடிக்கை எடுக்கப்படும்.
• 2011ம் ஆண்டில் ரூ. 3.75 லட்சம் கோடி விவசாயக் கடன் வழங்க இலக்கு.
• 5 மாபெரும் உணவுப் பூங்காங்கள் அமைக்கப்படும்
• தினந்தோறும் 20 கி.மீ புதிய தேசிய நெடுஞ்சாலை அமைக்கப்படும்
• அதிக பொருளாதார மண்டலங்கள் அமைக்க திட்டம்

4 அம்ச திட்டம்

• வறட்சி, வெள்ளத்தால் பாதிக்கப்பட்ட விவசாயிகள் கடனை திருப்பிச் செலுத்த கால அவகாசம் மேலும் 6 மாதம் நீட்டிப்பு
• விவசாய வளர்ச்சிக்கு 4 அம்ச திட்டம்
• 2 மாதங்களில் பணவீக்கம் கட்டுப்படுத்தப்படும்
• வெளிநாட்டு நேரடி முதலீட்டு கொள்கை மேலும் எளிமையாக்கப்படும்.
• நேரடி வரிகள் தொடர்பாக ஏப்ரல் 1ம் தேதி முதல் புது திட்டம்
• அரசுச் செலவீனங்களைக் குறைக்க நடவடிக்கை எடுக்கப்படும்

பெருமைக்குரியது டெண்டுல்கரின் சாதனை

"கடந்த 20 ஆண்டுகளாக என்னுடைய கிரிக்கெட் வாழ்க்கையில் பல்வேறு ஏற்றங்களில், இறக்கங்களிலும் உறுதுணையாக இருக்கும் இந்திய நாட்டு மக்களுக்கு இரட்டை சதத்தை அர்ப்பணிக்கிறேன். இரட்டை சதத்தை நினைத்து நான் ஆடவில்லை. ஆனால், 42வது ஓவரில் 175 ரன்களை எட்டியபோது தான் அதற்கான வாய்ப்பு இருப்பதாக உணர்ந்தேன். அடுத்து ஒரு இந்தியனே எனது சாதனையை முறியடிக்க வேண்டுமென்று ஆசைப்படுகிறேன்" ஒருநாள் ஆட்டத்தில் இரட்டை சதம் அடித்த உற்காத்தில் சச்சின் கூறினார்.
மத்தியப்பிரதேசம் மாநிலம் குவாலியரில் 2வது ஒருநாள் ஆட்டத்தில் இந்த சாதனையை நிகழ்த்தினார். 147 பந்துகளில், 6 சிக்சர்களும், 25 பவுண்டரிகளும் அடித்து ஆட்டமிழக்காமல் 200 ரன்களை எடுத்து உலக சாதனையை நிகழ்த்தினார்.
இந்த சாதனையின் மூலம் அவர் இந்தியாவுக்கு பெருமையை தேடி தந்துள்ளார். கர்வமில்லாமல் அடுத்து இந்த சாதனை இந்த மண்ணில் இந்தியர்களால் ஏற்பட வேண்டும் என்பதே அவரது ஆசையாக இருந்துள்ளது.
இதற்கு முன்னர் 2009ல் ஜிம்பாப்வே உள்ள புலவாயோவில் நடந்த ஜிம்பாப்வே அணி வீரர் கவன்ட்ரி 194 ரன்களும், 1997ல் சென்னையில் நடந்த பாகிஸ்தான் அணி வீரர் அன்வர் ஆட்டமிழக்காமல் 194 ரன்கள் எடுத்ததே சாதனையாக இருந்தது. அந்த சாதனையை நேற்று (பிப்ரவரி 25) சச்சின் முறியடித்தார்.

தோல்வியை சந்திக்கும் போது குட்டுவதும், சாதனை புரியும்போது பாராட்டுக்களை அள்ளுவதும் ஊடகங்களில் தொடர்ந்து நிகழ்கிறது. அனைத்தையும் கடந்து தனது சாதனையை புரிந்துள்ளார் சச்சின்.
கிரிக்கெட் வரலாற்றில் இதுவரை நிகழாத சாதனையை புரிந்ததன் மூலம் சச்சின் நமக்கெல்லாம் பெருமைத் தேடி தந்துள்ளார். அவரது இந்த பயணம் மேலும் வளரவும், பல்வேறு இளைஞர்களுக்கு அவர் ஒரு மாதிரியாக இருக்கவும் நமது வாழ்த்துக்கள்.
அவரது இந்த சாதனைக்கு வியாழனன்று கூடிய நாடாளுமன்றத்தில் அனைத்து உறுப்பினர்களும் எழுந்து நின்று கைதட்டி மகிழ்ச்சி தெரிவித்துள்ளனர்.
பிரதிபா பாட்டீல் புதனன்று விடுத்த வாழ்த்து செய்தியில், "எவரெஸ்ட் சிகரத்தை எட்டியதுபோல இந்த சாதனையை செய்திருப்பதன் மூலம் கிரிக்கெட் வரலாற்றின் சாதனை புத்தகத்தை தெண்டுல்கர் மீண்டும் ஒரு மாற்றி எழுதியிருக்கிறார். எதிர்கால சந்ததியினருக்கு கடினமான இலக்கை நிர்ணயித்து இருக்கிறார்" என்று கூறியுள்ளார்.
பிரதமர் மன்மோகன்சிங் உள்பட நாட்டின் பல்வேறு தரப்பிலிருந்தும் சச்சினுக்கு வாழ்த்து மழை பொழிந்துள்ளது.
வாய்ப்புகள் அமைந்தால்தான் ஒருவன் உயர்ந்த இடத்தை அடைய முடிகிறது. அந்த வாய்ப்பை நழுவ விடுபவன் முன்னேறாமல் பாதளத்தில் மூழ்கி கிடக்கிறான். அந்த வகையில் சச்சின் தனது வாய்ப்பை சிறப்பாக பயன்படுத்தி நாட்டின் கவுரவித்திற்கு மகுடமாக விளங்குகிறார். அதற்காக நாம் பெருமிதம் கொள்வோம்...!

அப்பாவிகளை பலி கேட்கும் பயங்கரவாதம்

உலக நாடுகளுக்கெல்லாம் ஒரு மிகப் பெரும் சவாலாக விளங்குவது தீவிரவாதம். ஒவ்வொரு நாடும் பாதுகாப்புக்கே பெரும்பகுதி நிதியை செலவிடுகிறது.

இந்தியாவில் புனே நகரில் ஜெர்மன் பேக்கரியில் கடந்த சனிக்கிழமையன்று (பிப்ரவரி 13) இரவு 7.30 மணியளவில் நடந்த குண்டு வெடிப்பில் 10 பேர் பலியாகினர். இந்த குண்டு வெடிப்பில் 4 பேர் விசாரிக்கப்பட்டு வரும் நிலையில் இன்னும் துப்பு துலங்கப்படவில்லை. நாடு முழுவதும் பாதுகாப்பு பலப்படுத்தப்பட்டுள்ளது. மக்களிடையே ஒரு அச்ச உணர்வு மேலோங்கியுள்ளது. அதே போல் மேற்குவங்க மாநிலம் மேற்கு மிட்னாபூரில் உள்ள சில்டாவில் மாவோயிஸ்ட்டுகளின் தாக்குதலில் செவ்வாயன்று (பிப்ரவரி 16) 25 ராணுவ வீரர்கள் பலியாகியுள்ளனர். மேலும் இந்தியா வரக் கூடாது என்று விளையாட்டு வீரர்களுக்கும் ஹஜ் என்ற தீவிரவாத அமைப்பு மிரட்டல் விடுத்துள்ளது.

உலகில் உள்ள எல்லா தீவிரவாத அமைப்புகளும் சாதாரண அப்பாவி மக்கள் உள்பட உயிர்களையே பலி கேட்கின்றன. ஏன் இந்த வெறி? இதனால் இவர்கள் சாதித்தது என்ன?
தீவிரவாதத்தை ஆதரிப்பதாக கூறப்படும் பாகிஸ்தானும் கூட தீவிரவாதிகளின் தொடர் தாக்குதலால் கடுமையாக பாதிக்கப்பட்டுள்ளது.
இந்தியா ஒரு ஜனநாயக நாடு. இங்கு அடக்குமுறை கிடையாது. ஒவ்வொருவரின் தேவைகளை கேட்கவும், அதற்காக போராடவும் உரிமை உண்டு. இந்நிலையில் தீவிரவாத அச்சுறுத்தல் என்பது மிகவும் வேதனையானது.
எந்த மத தீவிரவாதமாக இருந்தாலும் அப்பாவி மக்களை கொன்றால் அவர்கள் நினைத்தது நடந்து விடுமா? ஏதாவது ஒரு தீவிரவாத அமைப்பு "எச்சரிக்கை விடுவதற்காக" என்று ஒரு அசம்பாவிதத்திற்கு பொறுப்பேற்றுக் கொள்கின்றன. உங்களின் எச்சரிக்கைக்கு சாதாரண அப்பாவி மக்களின் உயிர்கள் தேவையா?
வன்முறையால் எந்த பிரச்சனைக்கும் தீர்வு காண முடியாது. வன்முறை மேலும் பல்வேறு பிரச்சனைகளுக்கே வழி வகுக்கும். இப்படிப்பட்ட தீவிரவாதிகள் அறவே ஒழிக்கப்பட வேண்டியவர்கள்; அவர்கள் மக்களிடமிருந்து தனிமைப்படுவார்கள். அவர்களை புறந்தள்ளக் கூடிய சூழலே நிலவும். இவர்கள் கொள்கை உண்மையாக மக்களின் நலனுக்காக இருக்கவே முடியாது.
நமது இந்த உலகம் பல்வேறு காலமாற்றத்தால் இயற்கை இடர்பாடுகளை சந்தித்துக் கொண்டிருக்கிறது. இந்த சவால்களிலிருந்து நாம் முன்னேற வேண்டிய கட்டாயம் முன்னே உள்ளது. அறிவியல் கண்டுபிடிப்புகளை அதிகப்படுத்தப்பட வேண்டிய சூழல் உள்ளது.
இந்நிலையில் தீவிரவாத இயக்கங்கள் மக்களின் நலன் சார்ந்த கோரிக்கைக்காக ஜனநாயக வழியிலான போராட்டத்தில் இறங்க வேண்டும். ஏற்றத்தாழ்வற்ற ஒரு சமூக உண்டாக்க போராட்டமே தீர்வு.
எனவே, தங்களின் தாக்குதல்களை கைவிட்டு அமைதியான சூழலுக்கு வாருங்கள்... பேச்சுவார்த்தையில் ஈடுபடுங்கள்... முடியாவிட்டால் மக்களை திரட்டி வீதியில் இறங்குகள்... அதுவே உங்களை மக்களின்பால் ஈர்க்கும். உங்கள் மக்கள் நலன் சார்ந்த கோரிக்கைகள் வெல்லும்.
அதிருப்தியடைந்தவர்கள் எல்லாம் துப்பாக்கி ஏந்தினால் இந்நாடு சுடுகாடாகத்தான் காட்சியளிக்கும். இரத்த சகதியில் எதை தேடப்போகிறார்கள் என்பதை சற்று சிந்திக்கவும்....

வேலி பயிரை மேய்கிறது

2010 பிப்ரவரி 8ம்தேதி திங்களன்று மதியம் 1.05 மணியளவில் ரகசிய விசாரணையை முடித்து கொண்டு பஞ்ச்குலா நீதிமன்றத்திலிருந்து வெளியே காரை நோக்கி நடந்தார் முன்னாள் டிஜிபி ஷாம்பு பிரதாப் சிங் ரத்தோர்.
காரை நெருங்கும் முன்பு ரத்தோரை பத்திரிகையாளர்கள் சூழ்ந்த தருணத்தில் மகாராஷ்டிராவைச் சேர்ந்த ஒரு இளம் பத்திரிகையாளர் தனது தாக்குதலை தொடுத்தார்.
ஆம். ரத்தோரின் முகத்தில் அந்த இளைஞன், தான் வைத்திருந்த கத்திகை கொண்டு 3 முறை தாக்கினார்.

இதில் காயமடைந்த ரத்தோர் கைக்குட்டையை வைத்துக் கொண்டு மருத்துவமனைக்கு அழைத்துச் செல்லப்பட்டார். அந்த இளைஞர் கைது செய்யப்பட்டு இழுத்துச் செல்லப்பட்டார்.
அந்த இளைஞரின் கோபத்திற்கு என்ன காரணம்?
ருச்சிகா கிர்ஹோத்ரா. 1990ம் ஆண்டு 14 வயது நிரம்பிய பத்தாம் வகுப்பு படித்து வந்த மாணவி. அவர் டென்னிஸ் விளையாட்டு பிரியரும் கூட.
1990 ஆகஸ்ட் 11 அன்று ரத்தோர், ருச்சிகாவின் வீட்டிற்கு வருகிறார். ருச்சிகாவின் டென்னிஸ் விளையாட்டிற்காக சிறப்பு பயிற்சி அளிக்க தான் ஏற்பாடு செய்கிறேன் என்று உறுதிபட ருச்சிகாவின் தந்தையிடம் கூறுகிறார்.
1990 ஆகஸ்ட் 12 (ஞாயிறு) அன்று ருச்சிகாவும், அவரது சிநேகிதி ஆராதனாவும் ரத்தோரை சந்திக்கிறார்கள். அப்போது ஆராதனாவை பயிற்சியாளரை அழைத்து வர சொல்லி வெளியே அனுப்பி வைக்கிறார் ரத்தோர். அச்சமயத்தில் அந்த சிறுமியிடம் ஈனச் செயலில் ரத்தோர் ஈடுபடுகிறார். பின்பு மிரட்டி அனுப்பி வைக்கிறார்.
இந்த ஈனச் செயலை செய்த 50 வயதான முதியோருக்கு என்ன தண்டனை கிடைத்தது?
இந்த சம்பவத்திற்கு பிறகு ருச்சிகா, அவரது குடும்பத்திற்கும், அவரது சிநேகிதி ஆராதனா குடும்பத்திற்கும் கடுமையான தொல்லைகளை கொடுத்து வந்தார். ருச்சிகாவின் அப்பா மீதும், அவரது 10 வயதே ஆன தம்பி அசு மீதும் கிரிமினல், திருட்டு, கொலை வழக்குகளை பதியப்பட்டன.
இந்த சம்பவங்களுக்கு உறுதுணையாக சப் இன்ஸ்பெக்டர் பிரேம் தூத், துணை சப் இன்ஸ்பெக்டர் சேவா சிங், சிஐஏ பணியாளர் ஜெய் நாராயண் ஆகியோரை ரத்தோர் பயன்படுத்தியுள்ளார்.

பின்பு 1993 டிசம்பர் 28 அன்று ருச்சிகா வருத்தம் தாளாமல் விஷம் அருந்தி தற்கொலை செய்து கொண்டார். மறுநாள் அவர் மரணமடைந்தார். அந்த கேள்வி பட்ட அரக்கன் ரத்தோர் விருந்தளித்து கொண்டாடினார் அன்று இரவு.
ஒரு உயிர் பலி அவனுக்கு கொண்டாடத்தையா தருகிறது...? எப்படியெல்லாம் இந்த கோணபுத்திக்காரன் யோசிக்கிறான்.
பிரேத பரிசோதனைக்கு பின் உடலை பெறுவதற்கு வெற்று பேப்பரில் கையெழுத்து பெற்றுக் கொண்டே கொடுக்கப்பட்டுள்ளது. பிரேத பரிசோதனையில் அந்த சிறுமியின் பெயர் ரூபி என்றும், அவரது தந்தை பெயர் சுவாஷ் சாந்தர் காத்ரி என்றும் எழுதப்பட்டுள்ளது.
அந்த சிறுமியின் இறப்புக்கு பின் அரசு ரத்தோர் மீதான வழக்குகளை முடித்து கொண்டது.
1994 நவம்பரில் ரத்தோர் இணை டிஜிபியாக பதவி உயர்வு அளிக்கப்பட்டது. அப்போது ஹரியானா மாநில முதல்வராக பஜன் லால் இருந்தார்.
1999 அக்டோபரில் இந்திய தேசிய லோக் தள் அரசின் முதல்வர் ஓம் பிரகாஷ் சவுதாலா இருந்தபோது டிஜிபியாக ரத்தோர் உதவி உயர்வு பெற்றார்.
2000-ல் பிஜேபி துணைத் தலைவர் சாந்தகுமார், "ரத்தோர் மீது உறுதியான நடவடிக்கை எடுக்க வேண்டும்" என்று முதல்வர் ஓம் பிரகாஷ் சவுதாலாவுக்கு கடிதம் எழுதினார்.
இப்படி முயற்சிகள், இழுத்தடிப்பு, விசாரணை என 19 ஆண்டுகள் கழிந்தன.
இந்த நிலையில் நாடாளுமன்றத்தில் பேசிய சிபிஎம் தலைவர் பிருந்தா காரத், "19 ஆண்டுகள் கடந்துவிட்டன. குற்றவாளி என தீர்மானிக்கப்பட்ட ரத்தோருக்கு 6 மாத சிறைத் தண்டனை அளிக்கப்பட்டது. 10 நிமிடத்தில் அவர் ஜாமீனில் வெளியே வந்திருப்பது என்ன நியாயம்?" என்று பேசினார்.
இந்த பின்னணியில் பல்வேறு இடங்களில் எழுந்த எதிர்ப்பின் காரணமாக மீண்டும் விசாரணை தீவிரமானது.

ரத்தோர் பொதுமக்களை பாதுகாக்கும் ஒரு உயர்ந்த இடத்தில் இருந்தவர். ஆனால், "வேலியே பயிரை மேய்ந்த கதையாக" ஒரு காவல்துறை அதிகாரியே இந்த ஈனச் செயலில் ஈடுபட்டது வெட்கக்கேடு; கடுமையாக தண்டிக்கப்படக் கூடியது.
ஆனால், அதே நேரத்தில் தப்பு செய்தவருக்கு தண்டனையை அனுபவிக்காதது மட்டுமின்றி, அவருக்கு பதவி உயர்வு மூலம் புகழ் மாலையே சூட்டப்பட்டுள்ளது.
இந்த நிலையில், ஒரு இளைஞன் ரத்தோரின் (தற்போது வயது 68) முகத்தில் கத்தியால் குத்தியிருப்பது சரியென்றே படுகிறது.
சட்டத்தின் பல்வேறு வழிகளை பயன்படுத்தி தான் செய்த தவறுக்கு வருந்தாமல் சிரித்து கொண்டு வலம் வரும் போது எல்லோருக்கும் கோபம் என்ற உணர்வே ஏற்படுகிறது.
இதுபோன்று பல்வேறு தவறுகளை செய்துவிட்டு, வழக்குகளில் தப்பிக் கொண்டு மக்களை முட்டாள் ஆக்கும் இதுபோன்றவர்களுக்கு சரியான பாடம் கற்பிக்கப்பட வேண்டும்; இதை அரசே செய்தால் மிகவும் நன்றாக இருக்கும்.

புலி ஊறுமுது...! புலி உறுமுது...!!

இந்தியாவின் மைய பகுதியாக விளங்குவது மும்பை. வணிக நகரமாகவும் மும்பை திகழ்கிறது.

சில தினங்களுக்கு முன்பு மெகா கிரிக்கெட் ஏலத்தில் பாகிஸ்தான் வீரர்கள் புறக்கணிக்கப்பட்டது குறித்து சர்ச்சை எழுந்தது. மும்பை நைட் ரைடர்ஸ் அணி உரிமையாளர் இந்தி நடிகர் ஷாருக் ஹான், "பாகிஸ்தான் வீரர்களை தங்கள் அணியில் சேர்த்து கொள்ள தயார்" என்று கூறியிருந்தார்.

இந்த அறிவிப்புக்கு சிவசேனா எனும் அமைப்பிடமிருந்து பலத்த எதிர்ப்பு கிளம்பியுள்ளது. "எடுப்பார்களா? எடுத்து பார்க்கட்டும், நாங்கள் என்ன செய்வோம் என்று அப்போது தெரியும்" என்று மிரட்டல் தொனியில் செய்தியாளர்கள் மையத்தில் கூக்குரலிட்டது சிவசேனா அமைப்பு.

மேலும், சிவசேனாவின் அதிகாரப்பூர்வ ஏடான "சாம்னா"விலும் பால்தாக்கரே, ஷாருக் ஹானை தாக்கி கடுமையாக எழுதியிருந்தார். போஸ்டர்களை கிழித்தும், ஷாருக் ஹான் நடித்த "மை நேம் ஹான்" என்ற திரைப்படத்தை திரையிடக் கூடாது என்று தியேட்டர் உரிமையாளர்களுக்கு மிரட்டல் விடுத்தும், மீறி வெளியிட்டால் பின்விளைவுகளை சந்திக்க நேரிடும் என்றும் கொக்கரித்து வருகின்றனர்.

இதே சிவசேனா அமைப்பினர், "முதலில் நான் இந்தியன்; அப்புறம்தான் நான் ஒரு மராட்டியன்" என்று சச்சின் டெண்டுல்கர் தெரிவித்த கருத்துக்கு "சாம்னா" தலையங்கத்தில் கடுமையான தாக்குதல்களை தொடுத்தனர். பகிரங்கமாக மிரட்டவும் செய்தனர்.

மும்பையில் தேர்தல் முடிந்து எம்எல்ஏக்கள் பதவிப்பிரமாணம் எடுத்துக் கொண்ட போது, "மராட்டி மொழியில்தான் பதவிப்பிரமாணம் எடுத்துக் கொள்ள வேண்டும்" என்று நவநிர்மாண் அமைப்பு மிரட்டல் விடுத்தது. மீறி பதவிப்பிரமாணம் எடுத்த ஒரு எம்எல்ஏவை கன்னத்தில் அறைந்தனர். எல்லோருக்கும் தாய்மொழி மீது பற்றிருக்கும். அதே நேரத்தில் வெறித்தனமாக செயல்படுவதையும், திணிப்பதையும் யாராலும் ஏற்றுக் கொள்ள முடியாது.

அதற்கு முன்பு, மகாராஷ்டிரா மாநிலத்திற்கு தேர்வு எழுத வந்த பீகார் மாநிலத்தைச் சேர்ந்த மாணவர்கள் மீது கடுமையான தாக்குதலை தொடுத்தனர்.

ஒரு நாடு அண்டைநாடுடன் சுமுக உறவை வளர்த்துக் கொள்வதன் மூலமே அந்நாட்டின் பொருளாதாரம் வளர்ச்சி பெறும். சுமுக உறவுக்கு விளையாட்டுப்போட்டிகள் ஒரு சிறந்த காரணியாக அமையும் என்பதில் ஐயமில்லை.

வளரும் நாடுகளில் ஒன்றான இந்தியா, வேற்றுமையில் ஒற்றுமை உள்ள ஒரு நாடாகும். இங்கு பல்வேறு மதம், இனம், மொழிகளைச் சார்ந்தவர்கள் வாழ்கிறார்கள்.

இந்நிலையில், இந்தியா தனது கொள்கைக்கும், கோட்பாடுக்கும், மரியாதைக்கும் இழுக்கு ஏற்படாவண்ணம் அண்டை நாட்டுடன் தனது உறவை பலத்த வேண்டும்.அதே நேரத்தில் உள்நாட்டில் சிவசேனா, நவநிர்மாண் போன்ற சுயநல சக்திகளை களைய வேண்டிய பொறுப்பும் உள்ளது.

தொடர்ந்து வரும் இதுபோன்ற உறுமல்கள் பயத்தை ஏற்படுத்துவதைவிட, கவலையையே ஒட்டுமொத்த இந்தியர்களுக்கும் ஏற்படுத்தியுள்ளது. அவர்களின் உறுமல் அடக்கப்பட வேண்டும். இந்தியர்களின் கவலை போக்கப்பட வேண்டும்.

இதுவே தற்போதைய இந்தியாவுக்கும் மிகவும் அவசியமாகும்!

ஜோதிபாசு : ஒரு சகாப்தம்

ஜோதிபாசு 1914-ம் ஆண்டு ஜூலை 8ம்தேதியன்று கல்கத்தாவின் ஹாரிசன் சாலையில் (இப்போது மகாத்மா காந்தி சாலை) உள்ள 43/1 ம் எண் வீட்டில் டாக்டர். நிசிகாந்தா பாசு மற்றும் திருமதி. ஹேமலதா பாசு ஆகியோரின் மூன்றாவது புதல்வனாகப் பிறந்தார். ஜோதிபாசு பிறந்தபோது அவருக்கு பெற்றோர் இட்ட பெயர் ஜோதிரீந்திர பாசு என்பதாகும். பள்ளியில் சேர்க்கும் போது பெயரைச் சுருக்கி அவர் தந்தை ஜோதிபாசு என்று மாற்றினார். வீட்டில் அவரை ‘கானா’ என்றே செல்லமாக அழைத்தனர்.

ஜோதிபாசுவின் தந்தை நிசிகாந்தா பாசு ஒரு மருத்துவர். அவரது பூர்வீகம் கிழக்கு வங்காளத்தின் டாக்கா மாவட்டத்தில் உள்ள பரோடி என்ற சிறு கிராமம். பின்னர் கல்கத்தாவுக்கு இடம் பெயர்ந்தார். 1917 ம் ஆண்டில் ஜோதிபாசுவின் பெற்றோர் பழைய ஹிந்துஸ்தான் கட்டிடம் என்று அழைக்கப்பட்ட (தற்போது ஃபட்னானி சேம்பர்) அடுக்குமாடிக் குடியிருப்புக்கு குடிபெயர்ந்தனர். பின்னர் 1920 ம் ஆண்டு கல்கத்தா ஹிந்துஸ்தான் சாலையில் சொந்த வீட்டில் குடியேறினர்.
1920ம் ஆண்டு 6 வயதில் ஜோதிபாசு கல்கத்தா தர்மடாலாவில் உள்ள லோரெடோ பள்ளியில் சேர்க்கப்பட்டார். அங்கு நான்கு ஆண்டுகள் தனது மழலைக்கல்வியைக் கற்றார். பின்னர் 1925 ம் ஆண்டில் புனித சேவியர் பள்ளியில் 2ம் வகுப்பில் சேர்க்கப்பட்டார். மெட்ரிக்குலேசன் தேர்வில் தேர்ச்சி பெற்ற அவர் தற்போது பிரெசிடன்சி கல்லூரி என்று அழைக்கப்படும் இந்து கல்லூரியில் ஆங்கிலம் (ஹானர்ஸ்) வகுப்பில் சேர்ந்தார். அங்கு அவருக்கு உற்ற நண்பராக விளங்கியவர் ரஹ்மான் என்பவர். இருவரும் வகுப்பறையில் கடைசி பெஞ்சில் அமர்வதையே பெரிதும் விரும்பினர். 1935ம் ஆண்டில் பட்டம் பெற்ற ஜோதிபாசு பாரிஸ்டர் பட்டம் பெறுவதற்காக அதே ஆண்டில் லண்டனுக்குப் பயணமானார்.

லண்டன் வாழ்க்கை

மாணவர் ஜோதிபாசுவின் லண்டன் வாழ்க்கை சுவாரஸ்யமானது. இங்கிலாந்து நாட்டைச் சேர்ந்த பொருளாதார அறிஞரான பேராசிரியர் ஹரால்டு லாஸ்கி என்பவர் அப்போது லண்டன் பொருளாதாரப் பள்ளியில் பொருளாதாரம் குறித்த சொற்பொழிவுகள் நிகழ்த்தி வந்தார். அவரது உரைகளால் ஈர்க்கப்பட்ட ஜோதிபாசு அடிக்கடி அங்கு சென்று வந்தார். அதே சமயத்தில் இங்கிலாந்தில் வசித்த இந்திய மாணவர்களை ஒருங்கிணைப்பது உள்ளிட்ட பல்வேறு விதமான அரசியல் நடவடிக்கைகளில் 1936 முதல் 1940 வரை (ஏறக்குறைய லண்டனில் இருந்த காலகட்டம் முழுவதுமே) ஈடுபட்டார். இதுதான் அவரது எதிர்கால அரசியல் வாழ்க்கைக்கு அச்சாணியாக இருந்தது என்றால் அது மிகையல்ல. பிரிட்டன் இந்திய மாணவர்களின் கூட்டமைப்பான இந்தியா லீகில் 1937 ம் ஆண்டு ஜோதிபாசு உறுப்பினரானார். மேலும் லண்டன் மஜ்லீஸ் என்ற அமைப்பிலும் உறுப்பினராக இருந்தார்.
இந்த அமைப்புகள் இங்கிலாந்தில் இந்திய விடுதலைக்கு ஆதரவாக நடந்த மாணவர் போராட்டங்களை ஒருங்கிணைத்தன. 1938 ம் ஆண்டு ஜவஹர்லால் நேரு லண்டன் சென்றபோது அவரை வரவேற்று ஒரு கூட்டத்திற்கு ஏற்பாடு செய்யும் பொறுப்பு ஜோதிபாசுவிடம் அளிக்கப்பட்டது. இதை ஜோதிபாசு சிறப்பாகச் செய்தார். இதேபோல் திரிபுரி காங்கிரஸ் மாநாட்டில் தலைவராகத் தேர்ந்தெடுக்கப்பட்ட சுபாஷ் சந்திரபோஸ், லண்டன் சென்றபோது மஜ்லிஸ் அமைப்பின் சார்பாக நடந்த வரவேற்புக் கூட்டத்தையும் சிறப்பாக நடத்தினார். இவ்வாறு இங்கிலாந்து வந்த இந்தியத் தலைவர்களை வரவேற்றது மட்டுமல்லாமல், லண்டன் தொழிலாளர் கட்சி மற்றும் சோசலிச எண்ணம் கொண்ட முற்போக்கான தலைவர்களுடன் அவர்களையும் இணைத்து கூட்டங்களை நடத்தினார்.

பிரிட்டன் கம்யூனிஸ்ட் கட்சியுடன்

இந்தக் காலகட்டத்தில் கிரேட் பிரிட்டன் கம்யூனிஸ்ட் கட்சியுடனான அவரது தொடர்புகள் வலுப்பட்டன. ஆனால் அக்கட்சியில் தானும் இணைய வேண்டும் என்ற ஜோதிபாசுவின் விருப்பம் நிறைவேறவில்லை. பிரிட்டன் கம்யூனிஸ்ட் கட்சியின் முக்கியத் தலைவர்களில் ஒருவரான ஹாரி பாலிட் என்பவரிடம் ஜோதிபாசு தனது விருப்பத்தைத் தெரிவித்தபோது, “இந்தியாவில் கம்யூனிஸ்ட் கட்சி தடை செய்யப்பட்டிருப்பதால் நீங்கள் நாடு திரும்பும்போது சில பிரச்சனைகள் வரும். எனவே இப்போது வேண்டாம்,’’ என்று கூறி அவர் மறுத்து விட்டார். ஆனால் ஒரு பார்வையாளராக ஜோதிபாசு கம்யூனிஸ்ட் கட்சிக் கூட்டங்களுக்கு தொடர்ந்து சென்று வந்தார். ரஜினி பாமி தத் உள்ளிட்ட சிறந்த மார்க்சிய அறிஞர்களின் பேச்சை அடிக்கடி கேட்கும் வாய்ப்பு அப்போது அவருக்குக் கிட்டியது.

அடித்தட்டு மக்களுடனான முதல் அனுபவம்

இங்கிலாந்து கம்யூனிஸ்ட் கட்சி கிழக்கு லண்டன் பகுதியில் உள்ள சேரிப்புறங்களில் வசித்த இந்திய மாலுமிகளுக்கு ஆங்கிலம் சொல்லித்தரும் பொறுப்பை ஜோதிபாசுவிடம் அளித்தது. இப்பணிக்காக மாணவர் குழு ஒன்றை உருவாக்கிய ஜோதிபாசு, நல்ல முறையில் அதனைச் செய்து முடித்தார். இதுதான் அவர் படிப்பறிவற்ற, ஏழை மக்களுடன் நெருங்கிப் பழகிய முதல் அனுபவம் என்பது குறிப்பிடத்தக்கது.

மீண்டும் இந்தியாவில்

இத்தகைய பரபரப்பான அரசியல் வாழ்க்கைக்கு இடையே படிப்பிலும் கவனத்தைச் செலுத்திய ஜோதிபாசு, 1939ம் ஆண்டின் இறுதியில் வெற்றிகரமாக பாரிஸ்டர் பட்டப் படிப்பை முடித்தார். பின்னர் 1940 ம் ஆண்டு ஜனவரி முதல் நாளன்று பம்பாய் வழியாக கல்கத்தா வந்தடைந்தார். அவரது வருகை குடும்பத்தாருக்கு மிகுந்த மகிழ்ச்சியைக் கொடுத்தது. ஆனால் தனது எதிர்கால வாழ்க்கைத் திட்டம் இந்திய கம்யூனிஸ்ட் கட்சியில் இணைந்து நாட்டுக்காகப் பணியாற்றுவதுதான் என்று ஜோதிபாசு கூறியது அவர்களை வாயடைத்துப் போகச் செய்தது. ஜோதிபாசுவை அரசியலில் ஈடுபட விடாமல் தடுக்க சில வழிகளில் முயற்சித்தனர். ஆனால் அவை பலனளிக்கவில்லை.

இல்லற வாழ்க்கை

இந்நிலையில் 1940ம் ஆண்டு ஜனவரி 20ம் தேதி ஜோதிபாசு- வசந்தி கோஷ் திருமணம் நடந்தது. இந்த மணவாழ்க்கை மிகக்குறுகியது என்பதுதான் சோகமானது. திருமணம் நடந்து இரண்டு ஆண்டுகள் கூட முடியாத நிலையில் 1942ம் ஆண்டு மே மாதம் 11 ம் தேதியன்று திடீரென்று வசந்தி கோஷ் காலமானார். அவரது மரணம் அனைவருக்கும் மிகுந்த அதிர்ச்சியைக் கொடுத்தது. எனினும் ஜோதிபாசுவின் அன்னை ஹேமலதாவை தீவிரமாகவே வாட்டியது. மிகுந்த கவலையடைந்த நிலையில் காணப்பட்ட அவர் சில மாதங்களுக்குப் பின்னர் இயற்கை எய்தினார்.
இதன் பிறகு ஆறு ஆண்டுகள் கழித்து 1948ம் ஆண்டு டிசம்பர் 5 ம் தேதி ஜோதிபாசு கமல்பாசுவை மணம் செய்து கொண்டார். அவர்களுக்கு 1951 ம் ஆண்டில் முதலாவதாகப் பிறந்த பெண்குழந்தை சில நாட்களிலேயே வயிற்றுப்போக்கு காரணமாக உயிரிழந்தது. அதன்பிறகு கோகா என்று செல்லமாக அழைக்கப்பட்ட சந்தன் 1952 ல் பிறந்தார்.

கம்யூனிஸ்ட் கட்சியில் முதல் பணி

1940 ம் ஆண்டு இந்திய கம்யூனிஸ்ட் கட்சி தடை செய்யப்பட்டது. ஆயினும் ஜோதிபாசு கட்சியின் முக்கியத் தலைவர்கள் பலரிடம் தொடர்புகளைப் பராமரித்து வந்தார். கூட்டங்களுக்கு ஏற்பாடு செய்வது, தலைமறைவு வாழ்க்கை நடத்தி வந்த தலைவர்களுக்கு தங்குமிடங்களை ஏற்பாடு செய்து கொடுப்பது போன்ற பொறுப்புகள் அப்போது ஜோதிபாசுவிற்கு அளிக்கப்பட்டன. இதனைச் சிறப்பாகச் செய்த அவர் வெளியில் இருந்த தலைவர்களும், தலைமறைவாக இருந்தவர்களும் தகவல்களையும், கருத்துக்களையும் பரிமாறிக்கொள்ள ஒரு இணைப்புப் பாலமாக விளங்கினார். நல்ல பெயரை இது அவருக்கு ஈட்டித்தந்தது.
1943ம் ஆண்டு இந்திய கம்யூனிஸ்ட் கட்சியின் முதல் அதிகாரப்பூர்வ மாநாடு நடந்தது. இதில் பிரதேசக்குழு அமைப்பாளர் என்ற பொறுப்பு ஜோதிபாசுவிற்கு வழங்கப்பட்டது. நான்காவது மாநில மாநாட்டின்போது அவர் பிரதேசக்குழு உறுப்பினராகத் தேர்ந்தெடுக்கப்பட்டார். 1946 ம் ஆண்டு காந்திஜி பெலிகட்டாவிற்கு வந்தபோது அவரை பூபேஷ் குப்தாவுடன் சென்று சந்தித்த ஜோதிபாசு, அனைத்துக் கட்சிகளையும் ஒருங்கிணைத்து ஒரு அமைதிக்குழு ஏற்படுத்தி அமைதிப் பேரணி நடத்துவது தொடர்பாக அவரது ஆலோசனைகளைப் பெற்றார்.

மாநிலச் செயலாளராக...

விடுதலைக்குப் பின்னர் இந்திய அரசு கம்யூனிஸ்ட் கட்சியைத் தடை செய்திருந்தது. அத்தடை 1951 ம் ஆண்டு விலக்கிக் கொள்ளப்பட்டது. அந்த ஆண்டில் ஜோதிபாசு இந்திய கம்யூனிஸ்ட் கட்சியின் வங்கமொழிப் பத்திரிகையான ’ஸ்வாதினாட்டா‘ வின் ஆசிரியர் குழுவின் தலைமைப் பொறுப்புக்குத் தேர்ந்தெடுக்கப்பட்டார்.
1953 ம் ஆண்டு கட்சியின் மாநிலச் செயலாளராக ஒருமனதாகத் தேர்வு செய்யப்பட்டார். பின்னர் 1954 ம் ஆண்டு மதுரையில் நடந்த அகில இந்திய மாநாட்டில் மத்தியக்குழு உறுப்பினராகவும் தேர்வானார். பாலக்காடு மாநாட்டில் மத்திய செயற்குழு உறுப்பினராகத் தேர்வு செய்யப்பட்ட அவர், 1958 ம் ஆண்டு அமிர்தசரசில் நடந்த அகில இந்திய மாநாட்டில் தேசியக்குழு உறுப்பினரானார்.

மார்க்சிஸ்ட் கட்சியில்...

1964 ம் ஆண்டில் இந்திய கம்யூனிஸ்ட் கட்சியில் பிளவு ஏற்பட்டது. அப்போது கட்சியிலிருந்து நீக்கம் செய்யப்பட்ட 32 தலைவர்களுள் ஜோதிபாசுவும் ஒருவர். பின்னர் மார்க்சிஸ்ட் கட்சி உதயமானபோது அதன் மத்தியக்குழுவிற்கும், அரசியல் தலைமைக்குழுவிற்கும் ஜோதிபாசு தேர்வு செய்யப்பட்டார். அன்றிலிருந்து அவர் இந்த இரு பொறுப்புகளிலும் தொடர்கிறார். அதேபோல் மேற்குவங்க மாநிலக்குழுவிலும், மாநில செயற்குழுவிலும் உறுப்பினராக உள்ளார்.

தொழிற்சங்கப் பணிகளில்...

ஜோதிபாசு சிறந்த தொழிற்சங்கத் தலைவராக மிளிர்ந்தவர். 1941 ம் ஆண்டு பி.ஏ ரயில்வே தொழிலாளர் சங்கத்தின் செயலாளராகச் செயல்பட்டார். அத்துடன் துறைமுகத் தொழிலாளர்களுடனும் பணியாற்றி சில அனுபவங்களைப் பெற்றார்.
1944 ம் ஆண்டு வங்காளம் மற்றும் அசாம் மாநில ரயில்வே தொழிலாளர்களை ஒருங்கிணைக்கும் பொறுப்பு அவருக்குத் தரப்பட்டது. இதனைச் சிறப்பாகச் செய்தார். பின்னர் 1948ம் ஆண்டு அகில இந்திய ரயில்வே தொழிலாளர் கூட்டமைப்பின் துணைத் தலைவராகத் தேர்ந்தெடுக்கப்பட்டார். 1953ம் ஆண்டில் நடந்த பிபிடியுசி சங்க மாநாட்டில் செயலாளராகத் தேர்ந்தெடுக்கப்பட்டார்.
சிஐடியு உருவாக்கப்பட்ட போது அதன் மேற்குவங்க மாநிலத் துணைத்தலைவர்களுள் ஒருவராக தேர்வு செய்யப்பட்டார். அதேவேளையில் அகில இந்திய துணைத் தலைவராகவும் தேர்வானார்.
இதேபோல் வெகுஜன அமைப்புகளான சோவியத் யூனியன் நண்பர்கள் (எப்எஸ்யூ) மற்றும் பாசிசத்திற்கு எதிரான எழுத்தாளர்கள்- கலைஞர்கள் சங்கம் ஆகியவற்றின் செயலாளராகப் பணியாற்றினார்.

மக்கள் பிரதிநிதியாக...

1946 ம் ஆண்டு வங்காள சட்டமன்றத்திற்கு ரயில்வே தொகுதியில் இருந்து தேர்வு செய்யப்பட்டார்.
அன்றிலிருந்து தொடர்ச்சியாக சட்டமன்ற உறுப்பினராக இருந்த ஜோதிபாசு 1957 ம் ஆண்டு முதல் 1967 ம் ஆண்டு வரை மேற்கு வங்க சட்டமன்றத்தின் எதிர்க்கட்சித் தலைவராகப் பணியாற்றினார்.
1967 மற்றும் 1969 ம் ஆண்டுகளில் அவர் ஐக்கிய முன்னணி சார்பாக மேற்கு வங்க மாநிலத்தின் துணை முதல்வராகத் தேர்வு செய்யப்பட்டார். 1967 ல் நிதி மற்றும் போக்குவரத்துத் துறைகளையும், 1969 ல் காவல் துறையை உள்ளடக்கிய உள்துறைப் பொறுப்பையும் கூடுதலாக கவனித்தார்.

இந்தியாவின் நீண்ட கால முதலமைச்சர்

காங்கிரஸ் கட்சியின் அராஜகச் செயல்களால் 1972 முதல் மேற்குவங்கத்தில் குழப்பம் நிலவியது. இதையடுத்து 1977 ம் ஆண்டு நடந்த சட்டமன்றத் தேர்தலில் மார்க்சிஸ்ட் கட்சி தலைமையிலான இடது முன்னணி பெரும் வெற்றி பெற்றது. அப்போது முதலமைச்சராகத் தேர்ந்தெடுக்கப்பட்ட ஜோதிபாசு 2000 ம் ஆண்டு நவம்பர் 3 ம் தேதி வரை அப்பொறுப்பில் இருந்தார். இந்திய அரசியல் வரலாற்றில் ஜோதிபாசுவைத் தவிர வேறு யாரும் இவ்வளவு நீண்ட காலம் முதலமைச்சர் பதவி வகித்ததில்லை என்பது குறிப்பிடத்தக்கது.
ஜோதிபாசு தனது நினைவுகளை அரசியல் சுயசரிதையாக எழுதியுள்ளார். மேலும் கட்சிப் பத்திரிகைகளில் அவர் ஏராளமான கட்டுரைகளை எழுதியுள்ளார். வங்கமொழியில் அவர் எழுதிய கட்டுரைகள் மட்டும் இதுவரை 5 பாகங்களாகத் தொகுக்கப்பட்டு வெளியிடப்பட்டுள்ளன.

108 வருடங்களுக்கு பின் வளைய கிரகணம்

சென்னை மற்றும் உலகம் முழுவதும் நீண்ட நேரம் நீடித்த அரிய கங்கண சூரிய கிரகணம் வெள்ளிக்கிழமை நடந்தது. முழுமையான சூரியகிரகணத்தை பார்ப்பதற்காக நாடு முழுவதும் இருந்து விஞ்ஞானிகள், மாணவர்கள் உள்பட 1000 பேர் கன்னியாகுமரியில் குவிந்தனர். சென்னையில் பகுதி சூரிய கிரகணம் தெரிந்தது.
சந்திரன் புவியை நீள் வட்ட பாதையில் சுற்றுகிறது. இதனால் புவிக்கும், நிலவுக்கும் உள்ள தொலைவு 4 லட்சம் கி.மீ. வரை மாறுபடுகிறது. வெகுதொலைவில் நிலவு இருக்கும்போது அதன் தோற்ற அளவு சூரியனின் தோற்ற அளவைவிட சற்று சிறியதாக இருக்கும். எனவே, அப்போது கிரகணம் நேர்ந்தால் சூரியனை சந்திரனால் முழுமையாக மறைக்க இயலாது. ஒரு கங்கணம் (வளையம்) போல சூரியனின் வெளிவிளிம்பு அதிகபட்ச கிரகணத்தின் போது வெளியே தெரியும். எனவே, இதனை கங்கண சூரியகிரகணம் என்கிறோம். அதுபோன்ற ஒரு கங்கண சூரியகிரகணம், 108 ஆண்டுகளுக்குப் பிறகு வெள்ளிக்கிழமை நிகழ்ந்தது.
இந்திய நேரப்படி காலை 10.44 மணிக்கு மத்திய ஆப்ரிக்காவில் துவங்கி 2.29 மணிக்கு சீனாவில் முடிவடைந்தது. அதிகபட்ச சூரிய கிரகணம் உலகெங்கும் 12.36 மணிக்கு நிகழ்ந்தது என்று விஞ்ஞானிகள் தெரிவித்தனர். தமிழகத்தில் கன்னியாகுமரி, நாகர்கோவில், திருநெல்வேலி, தென்காசி, தூத்துக்குடி, இராமேஸ்வரம், மதுரை, இராஜபாளையம், பரமக்குடி, சிவகங்கை, காரைக்குடி, புதுக்கோட்டை, பட்டுக்கோட்டை, வேதாரண்யம், நாகப்பட்டினம், தஞ்சாவூர், கும்பகோணம், மயிலாடுதுறை மற்றும் சிதம்பரம் ஆகிய பகுதிகளில் கிரகணம் தெரிந்தது.
சென்னையில் 82.33 சதவீதம் வரை சூரியனை சந்திரன் மறைத்தது. சென்னையில் கிரகணம் 11.30 மணிக்கு துவங்கி 3.05 மணி வரை நீடித்தது. அதிகபட்ச கிரகணம் பகல் 1.08 முதல் 1.15 மணிக்குள் நிகழ்ந்ததாக ஆராய்ச்சியாளர்கள் தெரிவித்தனர். கிரகணத்தைப் பார்க்க பிர்லா கோளரங் களத்தில் சிறப்பு ஏற்பாடுகள் செய்யப்பட்டிருந்தன. பொதுமக்களும் மாணவர்களும் நீண்ட வரிசையில் நின்று கிரகணத்தை பார்த்தனர். கன்னியாகுமரியில் காலை 11.06க்கு துவங்கி மாலை 3.05 மணி வரை நீடித்தது. இதில் முழு கங்கண சூரிய கிரகணம் பகல் 1.10 முதல் துவங்கி அதிகபட்சம் 9 நிமி டம் 58 வினாடி வரை நீடித் ததாக ஆராய்ச்சியாளர்கள் தெரிவித்தனர். இந்தியாவில் வேறு எங்கும் இவ்வளவு நேரம் தெரிந்திருக்க வாய்ப்பு இல்லை என்றும் தெரிவித் தனர். இந்த கிரகணத்தை காண நாடு முழுவதும் இருந்து அறிஞர்கள், விஞ்ஞானிகள், கல்லூரி மாண வர்கள் என ஆயிரத்துக்கும் மேற்பட்டவர்கள் கன்னியாகுமரியில் குவிந்திருந்தனர்.
இதற்கு முன்பு 1901 ம் ஆண்டு நவம்பர் 11 ம் தேதி நடந்த கங்கண சூரியகிரக ணத்தை தமிழகத்தில் பார்க்க முடிந்தது. 108 ஆண்டுகளுக் குப் பிறகு வெள்ளியன்று கங்கண சூரியகிரகணம் தெரிந்தது. மீண்டும் 2019ம் ஆண்டு டிசம்பர் 26 ம் தேதி தமிழகத்தில் தெரியும். அப்போது இதுபோன்ற கங் கண சூரியகிரகணத்தை காண இயலும்.
நூறு ஆண்டுகளுக்கு பின்னர் ஏற்பட்ட வளையல் (கங்கணம்) சூரிய கிரகணம் வெள்ளியன்று வலம் வந்தது. நிலவின் முழு நிழல் சூரியனை முழுமையாக மூடிய போது சூரியனின் ட்ட விளிம்பு மட்டுமே வளையல் போல வானில் ஜொலித்தது.
இந்த அற்புதமான கிரகண நிகழ்வு இராமேஸ்வரத்தில் மிகத்தெளிவாக தெரிந்தது. இந்த வளையல் சூரிய கிரகணத்தின் மையப் பாதை பாம்பன் தீவான தனுஷ்கோடியில் உள்ள ராமர்கோவிலை ஒட்டிச் சென்றது. இது மையப்பாதையில் இருந்து 2 கி.மீ. தொலைவிலும் இராமேஸ்வரத்திலிருந்து 7 கி.மீ. தொலைவிலும் இருந்தது.
இராமேஸ்வரம் கடலோரப்பகுதியில் வானில் வலம் வரும் விந்தையான வளையல் கிரகணத்தை பார்க்க விஞ்ஞானிகள், கிரகண ஆய்வாளர்கள், பொதுமக்கள் எனப் பல்லாயிரம் பேர் குவிந்திருந்தனர். இந்த வளையல் சூரிய கிரகணம் 11 நிமிடங்களுக்கு மேல் நீடித்தது. இந்தியாவில் இந்த சூரிய கிரகணம் காலை 11 மணிக்கு கேரளாவில் துவங்கியது. மாலை 3.15 மணிக்கு மிசோரமில் முடிவடைந்தது. கேரளாவின் தெற்கு பகுதியிலும், தமிழகத்திலும் வளையல் சூரிய கிரகணத்தின் அற்புதக் காட்சிகளை வானில் ரசிக்க முடிந்தது.
இராமேஸ்வரத்தில் இருந்து 18 கி.மீ. தொலைவில் உள்ள தனுஷ்கோடி, இந்த நூற்றாண்டின் நீண்ட நேர சூரிய கிரகணத்தை காண சிறந்த இடமாக அமைந்தது. ஒரே நேர்கோட்டில் சூரியன்-சந்திரன்- பூமியை நோக்கிய நிலையில் இந்த வளையல் கிரகணத்தை தனுஷ்கோடி, கன்னியாகுமரி, வர்கலா பகுதி மக்கள் மிகத்தெளிவாக பார்த்து ரசித்தனர்.
வளையல் சூரிய கிரகணத்தை பார்ப்பதற்காக 2260 கி.மீ. தொலைவில் உள்ள கொல்கத்தாவில் இருந்து தனுஷ்கோடி வந்த பரேஷ் சன்யால் என்பவர் கூறுகையில், பல சூரிய கிரகணங்களை பார்த்திருக்கிறேன். முதல்முறையாக இந்த கிரகணத்தில் ஒளிப்பிழம்பாய் ஜொலிக்கும் சூரிய வளையத்தைப் பார்க்கிறேன் என, கண்களில் ஆச்சரியம் விலகாமல் தெரிவித்தார்.
9 ராக்கெட்டுகள்
வளையல் சூரிய கிரகணம் ஏற்படுவதற்கு முன்பாகவும், ஏற்பட்ட பின்னரும் விண்வெளியில் காணப்படும் மாறுபாடுகளை கண்டறிய இந்திய விண்வெளி ஆராய்ச்சி மையம் (இஸ்ரோ) திட்டமிட்டது. இதன்படி இஸ்ரோ, மெல்லிய ஓசை எழுப்பக்கூடிய 9 ராக்கெட்டுகளை கிரகணத்திற்கு முன்பாகவும், கிரகணத்திற்கு பின்னரும் ஏவியது. இந்த ராக்கெட்டுகள் மூலம், சேகரிக்கப்படும் தகவல்களை பயன்படுத்தி சூரியக் கதிர்வீச்சு வேகத்தை உடனடியாக குறைப்பது குறித்து ஆய்வு மேற்கொள்ளப்படும். வளையல் சூரிய கிரகணம் மதிய நேரத்திலேயே ஏபட்டது. அப்போது சூரியக் கதிர்வீச்சு உச்ச கட்ட நிலையில் இருந்தது. மேலும் இக்கிரகணம் நீண்ட நேரம் நீடித்தது. எனவே இந்த இரு அரிய வாய்ப்புகளை பயன்படுத்தி சூரியக்கதிர் வீச்சின் தாக்கத்தை கட்டுப்படுத்த ஆய்வுகளை மேற்கொள்ளவுள்ளதாக இஸ்ரோ தெரிவித்தது.
தில்லியிலும் சிறப்பு ஏற்பாடுகள் செய்யப்பட்டிருந்தன.